Основни информациї
СУЧАСНИ УНИВЕРЗИТЕТ ЗОЗ ШТЕРНАЦ ФАКУЛТЕТАМИ
У ШТИРОХ ИСТОРИЙНИХ ЦЕНТРАЛНОЕВРОПСКИХ ГОРОДОХ
Универзитет у Новим Садзе зоз коло 50.000 студентох и 5.000 занятих єдно зоз найвекших наукових и образовних шедзискох у Централней Европи. Спада до шора такволаних комплетних або всеоблапяюцих универзитетох, хтори характеристични по тим же покриваю лєм цо нє шицки обласци науки и високого образованя.
У рамикох Универзитета реализує ше 350 акредитовани студийски програми на уровню основних, мастер, специјалистичних и дохторских студийох, чийо ношителє факултети и Универзитетски центер за интердисциплинарни и мултидисциплинарни студиї и виглєдованя (УЦИМСИ). Студийни програми сучасни и провадза розвой науки. Значну улогу у твореню науковей основи за їх перманентне осучасньованє, окрем факултета и УЦИМСИ-ю, маю и три науково институти.
Универзитет у Новим Садзе ма розвиту наукову инфраструктуру и моцни иновативни потенциял. Централна библиотека и библиотеки факултета и института розполагаю з богатим фондами кнїжкох хтори покриваю шицки релевантни науково обласци и оможлївюю приступ вельким електронским базом податкох. На основи окремного спорозуменя о сотруднїцтву, виглєдовачом, професором и студентом доступна и Библиотека Матици сербскей, найстаршей националней науковей и културней институциї, хтора снована 1826. року, у хторей ше находзи вецей як 3.000.000 публикациї. На Универзитету формоване коло 250 лабораториї. Окремни значносц за змоцньованє иновативносци ма Технолоґийни парк Универзитета у Новим Садзе. Зоз потримовку Факултета технїчних наукох и других членох Универзитета, формоване 140 start-up и spin-off компаниї, углавним у IT сектору, хтори даваю роботу младим инженєром зоз Универзитета у Новим Садзе. Дзепоєдни з нїх витворюю проєкти за вельки шветово компаниї и допринєсли тому же би Нови Сад у медзународних рамикох постал познати як „софтверска долїна“. Проєктни тими и визначни поєдинци зоз Универзитета добитнїки числених медзинародних и националних припознаньох за найлєпши технолоґийни иновациї. У рамикох Универзитета у Новим Садзе єст вецей акредитовани центри одличносци.
Студенти Универзитета у Новим Садзе посцигую вершински резултати у велїх обласцох, як цо то право, роботика, ґастрономия, спорт, уметносци и други. Академске културноуметнїцке дружтво Универзитета у Новим Садзе „Соня Маринкович“ познате по успишних наступох на фестивалох у жеми и иножемстве.
_____________
Универзитет у Новим Садзе повязує людзох, простор и час. Його факултети и институти ше находза у штирох историйних городох у Автономней Покраїни Войводини, на сиверу Републики Сербиї: Новим Садзе, Суботици, Зомборе и Зренянину.
Шедзиско Универзитета у Новим Садзе, у централним кампусу на побрежю Дуная, у нєпоштредней блїзкосци познатей Петроварадинскей твердинї, хтора вибудована у XVIII вику, и старого городского ядра. На тей локациї ше находза и Филозофски факултет, Польопривредни факултет, Природно-математични факултет, Правни факултет, Факултет технїчних наукох, Технолоґийни факултет, Факултет спорта и физичного воспитаня, Наукови институт за поживово технолоґиї и Институт Биосенс, як и оддзелєнє Економского факултета у Суботици. Медицински факултет, Академия уметносци и Институт за нїзкоровнїнске лєсарство и животни штредок ше пре практични причини находза у других часцох города. У Суботици ше находза Економски факултет, Будовательни факултет и Учительски факултет на мадярским наставним язику. У Зомборе шедзиско Педаґоґийного факултета, а у Зренянину шедзиско Технїчного факултета „Михайло Пупин“. Шицки институциї акредитовани и маю дозволи за роботу.
Студентом Универзитета у Новим Садзе на розполаганю специялизовани служби хтори обезпечую здравствену защиту, змесценє и костиранє. Здравствени услуги дава Завод за здравствену защиту студентох у рамику хторога исную специялизовани амбуланти, совитовалїща и оддзелєня лабораторийней дияґностики. Змесценє и костиранє обезпечує Студентски центер. Уровень услугох одвитує стандардом хтори прилапени у розвитих европских державох.
Универзитет у Новим Садзе будує свою будучносц вєдно зоз другим институциями хтори припадаю єдинственим науковим и образовним простору Европи, алє активно сотрудзує и зоз институциями зоз других часцох швета. Сотруднїцство засноване на числених билатералних и мултилатералних спорозуменьох.
ИСТОРИЯТ
Универзитет у Новим Садзе настал у окремним милєу хтори у войводянских городох стваряли ґенерациї високих интелектуалцох и институцийох од окремней националней значносци, чийо ше тирванє мера з виками. Фундаменти високого образованя на просторе нєшкайшей Автономней покраїни Войводини и Сербиї у цалосци, поставени коло 1740. року, зоз снованьом Висарионового колеґиюма (Collegium Vissariono – Pawlovicsianum Petrovaradinense) у Новим Садзе. Медзи найзначнєйшима предходнїками нєшкайшого новосадского универзитета Норма - школа за образованє сербских учительох, хтора снована 1778. року у Зомборе и Препарандия хтора снована 1812. року у Сент Андреї, чийо шедзиско 1816. року преселєне до Зомбору. Найзначнєйшу улогу у розвою науковей думки од 19. века мала Матица сербска – найстарша културна и наукова институция сербского народа, снована 1826. року у Пешти, хтора 1864. року преселєна до Нового Саду. Розвою правней науки и правного образованя на просторе нєшкайшей Войводини окреме допринєсол Правни факултет у Суботици, сновани 1920. року.
Велька синтеза вецейвиковного наздаваня, визиї, идейох и досягнуцох у обласци науки и образованя одбула ше 1960. року кед Народна скупштина Републики Сербиї принєсла Закон о снованю Универзитета у Новим Садзе, зоз хторим скорей сновани факултети повязани до єдинственей новосадскей академскей заєднїци.
Универзитет у Новим Садзе повязує людзох, простор и час. Нєшка представя єдно з найвекших образовних и наукових шедзискох у Централней Европи, зоз вецей як 50.000 студентох и 5.000 занятих на 14 факултетох, и трох институтох у штирох историйних универзитетских городох, Новим Садзе, Зомборе, Суботици и Зренянину.
Универзитет у Новим Садзе
Др Зорана Дїндїча 1
21102 Нови Сад, Сербия
Виробок сайту на руским язику потримал Покраїнски секретарият за образованє, предписаня, управу и национални меншини ‑ национални заєднїци.